ಜ್ಞಾನದ ಬಾಗಿಲು
ಜ್ಞಾನದ ಬಾಗಿಲು
ಅಂತರ್ ದೃಷ್ಟಿ ತೆರೆಯಿರಿ
ನಿದ್ದೆ ಸಾಕಿನ್ನು l
ಮೂಡಣದರಮನೆ ನೋಡಿರಿ
ಹೊಸವೈಚಾರಿಕತೆಯ
ಜ್ಞಾನದ ಬಾಗಿಲ ತೆರೆಯಿರಿ
ಜಡತ್ವ ಸಾಕಿನ್ನು ll
ಕನಸಿನ ಕಾಲಹರಣವದು
ಸುಖವಲ್ಲ ಅರಿಯಿರಿ l
ಮನಸಿನ ವಾಸ್ತವವದು
ಬದುಕಿನ ಸತ್ವವ ತಿಳಿಯಿರಿ ll
ಮುಂದಿನಿಂದಿನ ಮಂದೆಯ
ಹೊಗಳಿಕೆ-ತೆಗಳಿಕೆಗೆ l
ಬಿಡದಿರಿ ಬಾಯಿಯ
ಹಾಯಿರಿ ನೇರ ಹಾದಿಯ ll
ಹಾತೊರೆಯದಿರಿ ಗೌರವಕೆ
ನಿಮ್ಮ ನೀವರಿತರೆ ಸಾಕು l
ಜಗಕೆ ಬೆಳಕ ಕೊಡುವ
ದಿನಪವ ನೋಡಿದರೆ ಸಾಕು ll
ದೃಷ್ಟಿಗೆ ಬೇಕು ಸೃಷ್ಟಿಪ್ರಜ್ಞೆ
ಹೃದಯಕೆ ಸತ್ಯದೊಲುಮೆ l
ಮನುಜಮತವೇ ಶ್ರೇಷ್ಠಪ್ರಜ್ಞೆ
ಜೀವಜಗಕೆ ಗಾನದೊಲುಮೆ ll
ಮೌಢ್ಯವ ತೊರೆಯುತ ಬನ್ನಿ
ಜ್ಞಾನವ ಪಡೆಯುವ ಬನ್ನಿ l
ವೈಚಾರಿಕತೆಯ ಜ್ಞಾನದ
ಬಾಗಿಲ ತೆರೆಯುವ ಬನ್ನಿ ll