ವರ್ಷಧಾರೆ

ಹರುಷ ತಂದ ವರ್ಷಧಾರೆ

ಬಿಡದೆ ಸುರಿವುದು l

ಭೂಮಿಯೊಳಗೆ ಬೀಜವೊಡೆದು

ಚಿಗುರು ಜಿಗಿಹುದು ll

ಮುತ್ತಿನ್ಹನಿಗಳಲ್ಲಲ್ಲಿ

ಎಲೆಯ ಎದೆಯ ಗೂಡಿನಲ್ಲಿ l

ಸ್ವಾತಿಮುತ್ತು ಹರಳಿನಂತೆ

ಉರುಳುತಿವೆ ಅರಳಿನಲ್ಲಿ ll

ಮೋಡದಲ್ಲಿ ಮಿಂಚ ರೇಖೆ

ಫಳಾರನೆ ಹೊಳೆವಲ್ಲಿ l

ಗುಡುಗಿನಂತೆ ಎದ್ದು ಬಂದ

ಚಿಗುರ‌‌ಹಾಸು ನೋಡಲ್ಲಿ ll

ಆಸೆಗೆಲ್ಲ‌ ಹಸಿರು ಬಳಿದ

ಬೆಟ್ಟಗುಡ್ಡ ಗದ್ದೆ ತೋಡು l

ಹೂಡು ನೊಗವ ಸಂತಸದಿ

ಕೆಸರಿನೊಳಗೆ ಬದುಕ ಹೂಡು ll

ನೇಗಿಲೊಳು ಬಾಗಿನೊಳು

ಗದ್ದೆಯೊಡಲ ಒದ್ದೆಯೊಳು l

ಪಚ್ಚೆಪೈರು ಬೇರಿನೊಳು

ಮತ್ತೆ ಭೂಮಿಗಾನದೊಡಲು ll

ಹಸಿದ ಭೂಮಿ ಗೂಡಲೊಂದು

ಜಲದ ಹನಿಗಳಾಟವಾಡಿ l

ಹಸಿರ ರೆಕ್ಕೆ ಚಿತ್ತಾರ ಮೂಡಿ

ಜೀವಸೃಷ್ಠಿ ಮೋಡಿ ನೋಡಿ ll

ಹರುಷ ತಂದ ವರ್ಷಧಾರೆ

ಬಿಡದೆ ಸುರಿವುದು l

ಭೂಮಿಯೊಳಗೆ ಬೀಜವೊಡೆದು

ಚಿಗುರು ಜಿಗಿಹುದು ll