'सिनेमा'
'सिनेमा'
देखे न जावे नजारे,
सिनेमा ने लरका बिगारें।
आठ बजे तक,सो के उठत हैं।
बारह बजे तक वे सपरत हैं।
कह-कह के हम तो अब हारे।
सिनेमा ने लरका बिगारें।
देखें-------
पढ़वे में उनको मन नहिं लगत है।
चेहरा में उनके नहिं रंगत है।
नेम-धरम छोड़े सारे।
सिनेमा ने लरका बिगारें।
देखें------
बहकी-बहकी बात करत हैं।
देर रात तक वे जगत हैं।
हो रहे हैं वे मतवारे।
सिनेमा ने लरका बिगारें।
देखें-------
दूध-दही उनके मन खों न भावें।
मैगी चाऊमीन चाव से खावें।
चेहरा हो रयें कारे-कारे।
सिनेमा ने लरका बिगारें।
देखे--------
खेती-बाड़ी में मन नहिं लागे।
काम-धंधे से वे तो भागें।
सारे रिकार्ड तोड़ डारे।
सिनेमा ने लरका बिगारें।
देखें-------