શ્રીયંત્ર

દિવાળી નજીક આવી રહી હતી છાપાંઓમાં અને મેગેઝીનોમાં તો જાહેરાતોનો તો જાણે રાફડો ફાટ્યો હતો.

એમાં નલિનીબેનની નજર એક જાહેરાત પર પડી. તેમણે પતિ નવનીતરાયને બતાવતા કહ્યું કે, “મારે આ હીરો જોઈએ છે.” નવનીતરાયે ધ્યાન જ ન આપ્યું. નલિનીબેન કહે કે હવે તમને મારા પર પ્રેમ જ રહ્યો નથી અને મને ઓનલાઈન શોપિંગ કરતા આવડતું નથી. ને હવે હું તે શીખી જ લેવાની છું, પછી હું જ એ ઓર્ડર કરી લઈશ.” 

હવે નવનીતરાય અકળાયા અને કહે કે, “ઓર્ડર તો હું હમણાં જ કરી દઉં, પણ આ હીરો નથી. આ ‘શ્રીયંત્ર’ છે અને તે ફક્ત હીરા જેવું દેખાય છે. તો તું એકવાર આખી જાહેરાત ફરી વાંચી જો.”

નલિનીબેન તો જાહેરાત વાંચવાં લાગ્યાં. ધન સમૃદ્ધિ, સકારાત્મક વાતાવરણ, ઘરમાં સુખ-શાંતિ, સમાજમાં પ્રતિષ્ઠા, માનસિક શાંતિ, ઉજ્જવળ ભવિષ્ય, વધતો વેપાર, સંતાનસુખ, સ્વાસ્થ્ય સુરક્ષા…

જેમ જેમ વાંચતાં ગયા તેમ તેમ તેને અફસોસ થવા લાગ્યો કે પતિ નવનીતરાયનું કેટલું દિલ દુભાવ્યું હતું. કારણ કે આ બધું તો તેમને આ યંત્ર વગર જ મળી ગયું હતું. તેમાં કશી જ નવીનતા નથી. તો શા માટે ખોટા પૈસા વેડફવા જોઈએ !