લાલચ.

“લાલચ” 

“સંયમ, લે આ ડાયરી…
આ ડાયરી તું જે લખે, તે સત્ય બની જશે…”
દાદાના અવાજમાં એક અજાણી ગંભીરતા હતી.
હું હસ્યો—
“દાદા, આમાં કોઈ જાદુ નથી લાગતું… બસ એક જૂની ડાયરી છે.”
પણ દાદાએ કંઈ જવાબ આપ્યો નહીં.
એમણે ફક્ત ડાયરી મારા હાથમાં મૂકી…
અને એ જ રાતે એમનું અવસાન થયું.
✒️ પ્રથમ પાનું
થોડા દિવસ પછી મેં એ ડાયરી ખોલી.
પહેલું પાનું ખાલી હતું.
મારા મનમાં મજાક સૂઝી આવી…
“કાલે મને ₹25,000 મળશે.”
એવું મેં પહેલા પાને લખી દીધું.
બીજે જ દિવસે…
મારા જૂના મિત્રનો ફોન આવ્યો—
“અરે, તારા માટે એક કામ છે.
હું તને રોકડા ₹25,000 આપું છું.”
મારું હસવું… અચાનક અટકી ગયું.
✒️ બીજું પાનું
તે જ રાતે ફરી ડાયરી ખોલી.
હવે ઉત્સુકતા વધી હતી.
આ વખતે મેં લખ્યું—
“બા નો લાંબા સમયથી ચાલતો દુખાવો કાલે સારો થઈ જશે.”
બીજે દિવસે…
ડોક્ટરે કહ્યું—
“દવા એ જાદુઈ કામ કર્યું છે…
બા ના બધા રિપોર્ટ્સ નોર્મલ આવ્યા છે.”
હવે મને ડર લાગવા લાગ્યો.
✒️ ત્રીજું પાનું
થોડા દિવસ પછી…
હવે મનમાં એક ખોટો વિચાર આવ્યો…
“જે માણસે મને ઠગ્યો હતો…
તે કાલે મુશ્કેલીમાં પડશે.”
લખતાં જ હાથ કંપી ગયા.
બીજે દિવસે ખબર પડી—
એ વ્યક્તિનો અકસ્માત થયો હતો.
હું ડરી ગયો.
🌒 સત્યનો ભાર
હવે સત્યનો ભાર વધતો જતો હતો.
આ ડાયરી…
ફક્ત ઈચ્છા પૂરી કરતી નહોતી,
તે લોકોનું નસીબ લખતી હતી.
પણ પ્રશ્ન હતો—
હું કોણ છું, નસીબ લખનાર?
એક તરફ મદદ કરવાનો મોકો…
બીજી તરફ વિનાશ સર્જવાનો ખતરો…
મારા દરેક શબ્દમાં હવે જવાબદારી હતી.
✒️ અંતિમ પાનું
મોનોમંથન વચ્ચે મેં ડાયરી ખોલી.
અંતિમ પાનું સામે હતું.
હું લાંબા સમય સુધી ચુપચાપ બેઠો રહ્યો…
અને પછી ધીમે ધીમે લખ્યું—
“આ ડાયરી આજથી કોઈના ભવિષ્યમાં દખલ નહીં કરે.”
શાહી તરત જ સૂકાઈ ગઈ.
મેં રાહ જોઈ…
કશું થયું નહીં.
મેં ફરી લખ્યું—
“આ ડાયરી હવે સામાન્ય બની જશે.”
અચાનક…
પાનાં ટપોટપ ખાલી થઈ ગયા.
બધું જ લખાણ ગાયબ.
🌅 અંતિમ વળાંક
હવે મને સમજાયું—
ભવિષ્ય લખવાની શક્તિ માનવ માટે નથી…
આ ફક્ત એક પરિક્ષા હતી.
મેં ડાયરી બંધ કરી…

એટલામાં દાદાનો અવાજ આવ્યો

“સંયમ! ઘણું સૂઈ ગયો… હવે ઉઠ અને હોમવર્ક લખવા બેસ!”
હું અચાનક જાગી ગયો…
હાથમાં કોઈ ડાયરી નહોતી.
મેં થોડુક સ્મિત કર્યું …
દાદા તો જીવતા હતા, તેમના હાથ માં જાડી નોટ હતી....

"કઠોર પરિશ્રમ નો કોઈ વિકલ્પ નથી...."
એવુ હવે સમજાઈ ચૂક્યું હતું.

જાદુ ચમત્કાર કરવાની લાલચ હું,સ્વપ્નમાં જ છોડી આવ્યો હતો.

હા, અને હવે હું સ્વપ્ન લોકમાંથી
ફરી ધરતી લોકમાં પાછો આવી ગયો હતો.