વરસુ અનરાધાર

ઘનન ઘન ગરજે મેહુલિયો

નભમાં ચમકે વીજ !

તાત જગતના હાથ નેજવે

આવી અષાઢી બીજ !

ધરતી તરસી 

ન વાદળી વરસી !

વરસે મેઘો આસ જાગેલી

હૈયે ઉછળે થનગનતી હેલી !

ધરતી તરસે ચાતક તરસે

ક્યારે નભથી અમૃત વરસે !

પાડી ચાસ ખેતરે ખેડુ

સ્નેહભર્યું કરે મેઘાનું તેડું !

વાવવા બીજ, જમવા કંસાર !

મન મૂકીને મેહુલિયા વરસો અનરાધાર !

રિસાઈ ધરા જોને જરા,

વરુણ હવે તો રીઝ !

રખે ને આ વસુંધરાને,

ચડશે જોને ખીજ !

પિગળ્યું ઉર ગગન તણું

ઝરમર ઝરમર વરસતા ઘણું !

પૂછે ધરાને વહાલથી !

તું આલિંગન આપવા છે તૈયાર ?

તો હું વરસુ અનરાધાર...... !