વરસતાં પહેલાં

વરસતાં પહેલાં આ ઉકળાટ આપતી તારી પ્રથા,

જાણે મધુર મિલન પહેલાં એ વિયોગની વ્યથા !

ગોરંભાતું આ નભ ને મંદમંદ ફરકતી પેલી લતા,

જાણે તારા ઘેઘૂર કેશે ગૂંથેલી વેણી કેરી અદા !

આ મેઘ કેરા નાદ માંહી ચમકતા વીજ લીસોટા,

તારા ગંભીર મુખ પર દમકતી એ આંખોની છટા !

વૈભવ વરસાવતી ઉન્માદ વેરતી આ મેહુલ ઘટા,

જાણે પ્રણય તરબોળ તવ હોઠ કેરી એ તરલતા !

વણથંભી જાણે આ અનંત હેલી તણી માદકતા,

એવી જેમ તુજ સંગે પ્રસરતી મુજ હૃદયે મધુરતા !

ભીનાશ શ્વાસે ભરાતી હવે વરસ્યાંનો થાક ખાતી,

જાણે તારા શુભ્ર રૂપસાગરની લહેરો શાંત થાતી !

જોઈ રહ્યો હું એ સૂર્ય પ્રગટ્યો મેઘની બારીએથી,

જાણે ચમકતું મુખ ચંદ્ર સમું ઘેરી લટોની મધ્યથી !

વરસતાં પહેલાં આ ઉકળાટ આપતી તારી પ્રથા,

જાણે મધુર મિલન પહેલાં એ વિયોગની વ્યથા !