વરસાદી મોસમ

ચાલને હું ને તું, થોડા સ્નેહે વરસીએ

ને ઓલા વરસાદને હસીને પૂછીએ,

અલ્યા મેહુલા કહેને અમને -

તારા જેવું વરસતાં આવડ્યું કે નહીં ?

ભાવે ભીંજાવું ને ભીંજાઈ અંતરે ખીલવું

નયનોમાં જોને વરસે રે નેહ

તારી સરવાણીએ રમે મન મસ્તી

લાગણીઓના છે મીઠડા રે મેહ,

ખુદ અમે ભીંજાયેલાને ભીંજવ ઓ મેહુલા 

કે લાગે એ મીઠડા સરપાવા 

જેમ ઝીલી તને સરિતાનું જોબનિયું ખીલતું 

અમને દે ને ખીલવાના લ્હાવા

ઘનઘોર આભલે, વાયરાને વાવટે 

ગાજ ગાજ આજે ઓ શામળા 

અંતરના છાપરે ટહુકે મન ઓરતા 

થનથન નાચે માણીગર મોરલા,

ધરતીને બાથવા કેવો છૂટે તું આભથી 

મ્હેંકે આ પહેલા મિલનની વારતા 

મારા ગોરા તે ગાલે પથરાય ભીંનાશું 

ગમે શરમથી નીતરવું ઝૂમતાં,

વરસાદી મોસમની સૂણજો વાત બધી મીઠડી 

સાથે પલડે એ માણે ઝબુકતી વીજળી.(૨)

રમેશ પટેલ(આકાશદીપ)