વિયોગી

અંતરની ખરલે લાગણીને વાટી,

'ને ઉમેર્યા છે વ્હાલપના વેણ રેં,

જાણે ક્યારે દીઠશું પિયુંના નૈણ રે !

વિરહીના દુઃખડાની દવા અજાણી,

'ને હૈયામાં ફૂટી શબદ સરવાણી,

મેં તો પીધાં છે પ્યાલા ભરી સેણ રે,

જાણે ક્યારે દીઠશું પિયુંના નૈણ રે !

લીલી વનરાયું ને ટહુકા ભીના,

કામણ ઘણા છે તારી છબીના,

મુને વાયરા વરસાદી મારે મેણ રે,

જાણે ક્યારે દીઠશું પિયુંના નૈણ રે !

સ્મરણો સંગાથે શ્વાસો ટકવ્યા,

'ને તન, મન સાથે સપના સજાવ્યા,

મેં તો કાપી છે આંસુડેથી રેન રે,

જાણે ક્યારે દીઠશું પિયુંના નૈણ રે !

કારણ વિના કેમ વિયોગ સાંપડે ?

વિધી હૈયાની વાતો ન સાંભળે !

મારી કપરી નસીબની લેણદેણ રે.

જાણે ક્યારે દીઠશું પિયુંના નૈણ રે !