વહુ કહે હું શું કહું

વહુ કહે હું શું કહું ?

શું માત્ર દીકરી કે મા માટે લખાય

શું વહુ માટે પણ થોડા શબ્દો ના હોય ?

શું વહુની માત્ર ઘર માટેની ફરજ જ હોય ?

શું વહુ ના હક ના હોય ?

શું વહુની જ જવાબદારી હોય ?

શું વહુ પ્રત્યેની જવાબદારી ના હોય ?

શું માત્ર વહુ સાસુ સસરાનું ધ્યાન રાખે ?

કયારેક તેનું પણ ધ્યાન રાખી ના શકાય ?

શું માત્ર ઘર વહુનું જ હોય છે ?

શું માત્ર વહુને જ કામકાજનો ભાર હોય ?

શું ઘરની દરેક વ્યક્તિની જવાબદારી વહુની જ હોય ?

શું વહુ પ્રત્યેની જવાબદારી હોય ખરી ?

શું વહુ જ આમંત્રણ આપે ?

શું વહુને આમંત્રણ ના હોય ?

શું વહુ માટે હમેંશા અપશબ્દો જ હોય ?

તો પછી સન્માનની અપેક્ષા શા માટે વહુથી રખાય ?

વહુની પાસેથી દીકરીની સુવાવડથી માંડી નાની મોટી સારવારની અપેક્ષા હોય, પણ વહુની સુવાવડમાં મોઢું પણ ન જોવાય તેવા રિવાજ શું હોય,

વહુ કયાંથી શીખે ? 

જેવો વહેવાર તેવો તહેવાર ?

વહુની માત્ર ઉપેક્ષા અને રાખો ઘણી અપેક્ષા,

શું તે પણ દીકરી નથી ?

તેના પણ માં બાપ માટે ફરજો ના હોય ?

માત્ર દીકરીના જ ગાણા હોય ?

દીકરી લાવે તો સારું ?

અને વહુ લાવે તે નકામું ?

દીકરી દીકરી કરી વહુ તો લવાય

પણ શું વહુને દીકરી ગણી શકાય ?

માત્ર અમુક વહુ ના કારણે 

આખી વહુની જાત વગોવાય ?

દીકરીને શીખવશો

અને વહુને માત્ર ટોક ?

ફરજ દીકરાની પણ હોય ?

વગોવાય માત્ર વહુ,

માટે વહુ પણ કહે હું શું કહું ?

કયારેક વહુ માટે પણ પાણી લાવી શકાય,

શું વહુના કરેલા ઉપકાર ભૂલી શકાય ?

શું વહુની ગણતરી ઘરનાં કામકાજ પૂરતી ?

વહેવારમાં માત્ર અવગણના પૂરતી ?

પોતાનાં સાસુ સસરાને ના રાખતી દીકરી 

જ્યારે વહુને સન્માન શીખવાડે ત્યારે વહુ પણ વિચારે હું શું કહું વહુ તમને ?

શું કહું ?