વહાલનું વાદળ
વહાલનું વાદળ
ને પછી... ! !
આ અષાઢી વાદળ,
તને યાદ તો હશે જ ને,
હા, એ કંઈ ખાલી ઝરમર ફોરામાં,
ભીંજાવાની વાત નહોતી !
એકરારમાં જ એકાકાર થવાની,
વાત હતી !
લાગણીઓનું ઘોડાપૂર તો આવ્યું,
અને પલાળીને જતું રહ્યું.
એક છત્રીમાં પલળતો,
તારો એક ખભો હજુ યાદ છે !
વાદળ જ્યારે અનરાધાર,
વરસીને આ ધરાને સરાબોળ કરે છે,
જાણે ભીની માટીની મહેંકતી હૂંફ આપે છે.
અને પવનની આ ઠંડી લહેરખીઓ,
વાદળને ધરાની સંતૃપ્તિનો સંદેશો,
પહોંચાડે છે ત્યારે વાદળ પણ જુકીને,
જાણે ધરાને એની આગોશમાં લઈ લે છે.
આપણું પણ કંઈક આવું જ છે,
કોઈ ગમે અને અંદર વહાલના,
વાદળ બંધાવા લાગે છે !
કોઈનો મનગમતો સાથ મળે તો,
વગર વરસાદે ભીંજાઈ જવાય.
બાકી પલળવાનું તો રોજ છે !