વાદળ

એક વાદળ વરસે ભીતર આરઝૂઓનું અનરાધાર,

ને થયા નયન અમારા અમથા અમથા જળબંબાકાર !

ને મથાવી રહ્યો મુજને એક મૌન ગડગડાટ મુજ મહીં,

ડરાવે આંખો કાઢી કાઢી ચાબૂક જેવી વીજનો ચમકાર !

કોઈ જ ન પરખી શક્યું ભીની આંખને આ ધોધમારમાં,

વરસતી આકાશી ધારનો હતો એ અનોખો ચમત્કાર !

થઈ રહ્યા વ્હાલપની વર્ષાના વધામણાં હર ધબકારે,

ને રૂદિયાની ધરા ઉપર હતો એક અદ્વિતિય આવકાર !

મિલનની ક્ષિતિજો થઈ અદ્રશ્ય ધૂંધલકામાં જે ઘડી,

પ્રેમરંગો ફેલાયા છે બનીને ઈન્દ્રધનુષનો અવતાર !

"પરમ" ટહુકાઓ સાંભળી શકે તો સાંભળ મન મોરલીયાના,

ઢેલડી બનીને તુંય થા મદમસ્ત, "પાગલ" થઈ પળવાર !