ગઝલ- એકરાર

એકધારા વિચાર આવે છે,

સોળ સત્તર અઢાર આવે છે,

સાંભળી સાદ એક જૂનો ત્યાં,

આંગણુ ડેલી બ્હાર આવે છે,

બારણાં બંધ, બંધ બારીઓ,

ચીખતો સૂનકાર આવે છે,

મેં જવાનું જ છોડી દીધું છે,

ખોખલો આવકાર આવે છે,

જીંદગી આપશે ખુલાસાઓ,

એક બે નહિં હજાર આવે છે,

ઉમ્રનું કામ ઉમ્ર કરશે દોસ્ત,

એક સાચો ચિતાર આવે છે,

તો જ સંપૂર્ણ આ ગઝલ થાશે,

આપણો એકરાર આવે છે,

મેં પ્રથમ જાતને વખોડી છે,

દોષ મારાં અપાર આવે છે,

કામ બાકી ઘણાં ઘણાં "જોગી",

ને સમય માર માર આવે છે.