ઉછરંગ છો ઉત્સવ તણો

દીપક દયાનો દિલ મહીં પ્રગટાવ તો દીપાવલી !

કરૂણા તણું ઓઢી ગવન, ખર્ચાવ તો દીપાવલી !

તન મન મહીં ઉત્સાહ આંજી દે, દિવાળી છે બારણે, 

હર ઘર મહીં ઉજાસને પથરાવ તો દીપાવલી !

 

ઉછરંગ છો ઉત્સવ તણો, ભૂલાય ના લાચાર જન,

નૈરાશ્ય નાથી, આશ દઈ મલકાવ તો દીપાવલી !

આ રંક જન તો અંધશ્રદ્ધામાં સદા અટવાય છે, 

તું આગિયો થઈ, રાહ ને ઝળકાવ તો દીપાવલી ! 

થઈ બાપડાં ઘૂમી રહ્યાં, ઓઢી નિરાશા ઓઢણું !

આશા તણો અંકુર થઈ, હરખાવ તો દીપાવલી !