તારી સાથે
તારી સાથે
તારી સાથે એક અનોખો સંગાથ છે,
ફક્ત તારી જોડે જ મારો અનોખો મિજાજ છે,
થોડી જ ક્ષણ હો ભલે મુલાકાત માટે,
જીવાય જવાય છે જિંદગી એ એક પળ વાટે,
ખાટી મીઠી વાતો ને મીઠા ઝઘડાંની મોજ છે,
રિસામણા મનામણા અહીં ન આવે અહીં તો લાગણીનો હોજ છે,
બંધન આપણું કેવું અજોડ રચાયું છે !
નામ વિના જ આ સંબંધે જોડાયું છે,
એક મૌનનો આકાર ને એક શબ્દની સૌગાત,
વહેતી રહે લાગણીઓ અવિરત આરપાર,
ના સ્વાર્થ છે ના કોઈ અપેક્ષાનું મહોતાજ છે,
બસ એક સ્નેહનું જ વિશાળ આકાશ છે,
કાળજી ને ચિંતા એકદમની અપાર છે,
ખુદથી વધુ એકમેકમાં વિશ્વાસ છે,
ખુદા પાસે તારી જ દુઆ ચાહું,
સ્મિત બની બસ તારા ચહેરે વહું,
તારી સાથે એક અનોખો અહેસાસ છે,
તારા આત્મા સાથે સીધો જ સહેવાસ છે,
રાધાકૃષ્ણનો એક અનોખો સંગાથ છે,
પ્રેમની પરિભાષાનો એક આગવો મિજાજ છે.