તારા સુધી

કોઈ આવીને મને લઈ જાય છે તારા સુધી,

ભાન છે બસ આટલું, જીવાય છે તારા સુધી.

મૌન રહીને બે અધર સંવાદ ચાહતનો કરે,

ધન્ય છું, નિ:શબ્દતા પડઘાય છે તારા સુધી !

રેત ને રસ્તા સરીખું સંવનન આ આપણું,

શૂન્યતાનું રણ મને લઈ જાય છે તારા સુધી.

ના પરિચય ગાઢ તો પણ કેવી આ દીવાનગી ?

લોહચુંબક જેમ મન ખેંચાય છે તારા સુધી.

સ્હેજ આસું છલકે જો મારા નયનથી તો પછી,

પૂરની માઠી અસર વર્તાય છે તારા સુધી.

સાવ નિર્જન પ્રાંતમાં એકાંત જો ઘેરી વળે,

એ પછી રસ્તા બધા ફંટાય છે તારા સુધી !

"ચાહું છું" બસ આટલું કીધું હતું તેં એકવાર,

ત્યારથી ચાહતના તળ લંબાય છે તારા સુધી.

શ્વાસમાં તું,ચાહમાં તું,હરઘડી સંગાથમાં તું

"તું" ને "તું" ની વાત શું ચર્ચાય છે તારા સુધી ?

   

બંદગીમાં હો ખુદાનું, સ્થાન ત્યાં તારુંય છે,

આંખ બે મીચું, તરત પહોંચાય છે તારા સુધી.