ગઝલ શું રાખવું બાકી ?
ગઝલ શું રાખવું બાકી ?
સજળ નયનમાં તમે છો, શું રાખવું બાકી ?
હૃદય પછી આ પ્રણયમાં શું હારવું બાકી ?
કમી આ કોની સતત રક્તમાં વહે છે રોજ ?
નદી થવાની ત્વરામાં શું પામવું બાકી ?
તમે જે આપ્યું એ અણમોલ છે હું માનું છુ,
હું આંસુની આ જણસને શું સાચવું બાકી ?
હવાની સાથે સ્મરણ શ્વાસમાં લઈ જીવું,
તમે જ જિંદગી, તમને શું આપવું બાકી ?
હજાર રીતથી છુપાય નહિ, છે જગજાહેર,
કિતાબ જેવા પ્રણયમાં શું ઢાંકવું બાકી ?
ખરું કશુંય હતું નહીં, હતા નર્યા આભાસ,
હવામહેલના ખયાલે શું રાચવું બાકી ?
જતાં જતાં કરી ગ્યા છે એ પાનખર નામે,
વસંતના પરિવેશે શું આવવું બાકી ?
નથી એ મારા છતાં દિલથી ચાહતી રહું છું,
સમાધિની છે અવસ્થા, શું ત્યાગવું બાકી !
રહેમ આપની, પીડા આ છંદ પામી ગઈ,
ગણિત જેવી ગઝલમાં શું ટાંકવું બાકી !