અર્થ શું
અર્થ શું
પીડા જળની, પથ્થરે ધરબાય એનો અર્થ શું ?
દરિયે ભળવા, ખુદ નદી ખોવાય એનો અર્થ શું ?
પ્રેમ લેવાં આંસુ જો ખર્ચાય એનો અર્થ શું ?
છે રૂપાળો ભ્રમ, પછી સમજાય એનો અર્થ શું ?
જે મને મહેકાવતો રહે સ્પર્શ કોઈ ખાસ એ,
ચોપડીમાં ફૂલ થઈ સચવાય એનો અર્થ શું ?
જીવતા જણની વ્યથાથી દર્દ સહેજે ના થયું
લાશ જોઈ આંખ બે છલકાય એનો અર્થ શું ?
રોશની બીજાને આપે, એની વરવી અવદશા !
દીવો ખુદ અંધારને અથડાય એનો અર્થ શું !
સાવ મામૂલી ગણીને અવગણાઈ રોજ એ,
લક્ષ્મી કહીને એક દિ પૂજાય એનો અર્થ શું ?
માનવી સમ માણસાઈ ઈશમાં હોવી ઘટે,
નભનું પંખી ધરતી પર પટકાય એનો અર્થ શું ?
ઓ ખુદા ! તું શ્વાસ દઈને જુલ્મ આવો ના કરીશ,
ભાર ખુદનો ખુદથી ના વેઠાય એનો અર્થ શું ?