માંગી લાગણી જીવણ

જુદી રીતે મહોબ્બતમાં સજાવી લાગણી જીવણ,

હૃદય તૂટ્યું છતાં અકબંધ રાખી લાગણી જીવણ, 

ધરા આઘી, ગગન આઘું, ક્ષિતિજ પર તોય એકાકાર,

મિલનની આ પરાકાષ્ટાને માની લાગણી જીવણ,

જીવનદાતા નહીં તો શું બીજી ઉપમા હું એને દઉં ?

હવા થઈને જીવાડે છે તમારી લાગણી જીવણ,

નથી ઉન્માદ આ મારો, છે પીડા ડામવાની રીત !

ભરી બાથે જો હૈયા સરસી ચાંપી લાગણી જીવણ,

હવા, પાણી અને ખોરાકથી કેવળ જીવાતું ક્યાં ?

સહાયક ગણની યાદીમાં સમાવી લાગણી જીવણ,

ખુદા, જિસસ કે ઈશ્વરની જ હારોહાર પૂંજી છે,

બધા સ્થાનકમાં શ્રદ્ધા સંગ સ્થાપી લાગણી જીવણ, 

                    

બધીએ ગાંડપણની હદ વટાવી ચાહી છે એને !

મેં ફાંસીની સજા સાથેય માંગી લાગણી જીવણ, 

ઘણું કહેવું હતું જગને ગઝલના માપમાં તેથી, 

લગાગાગા લગાગાગામાં બાંધી લાગણી જીવણ.