સંશય નથી

નકલી ફૂલોના મહેંકવા પર જેમને સંશય નથી,

એ સૌ કહે છે, ખુશ્બૂ પારખવાની તારી વય નથી,

સંચાર છે એનો નિરંતર આ સકલ અસ્તિત્વમાં,

સર્વત્ર ચેતન તત્ત્વ છે એ કોણ જેનો ક્ષય નથી ?

સિદ્ધાંત છોડી‌ જીતવું ના પાલવે હરગિસ મને,

સિદ્ધાંત છોડી મેળવેલી જીત એ કંઈ જય નથી,

સંબંધના કુરુક્ષેત્રમાં છે કોણ કોનું શી ખબર !

છું લાગણીમાં અંધ 'ને પાસે કોઈ સંજય નથી,

લોકો કહે છે, કેફ ચડવા લાગે છે જોઈ ફકત,

મારાં નયન તો બસ નયન છે કંઈ નશીલો મય નથી,

બે-ચાર શબ્દો જોડીને એ પણ ગણે ખુદને કવિ,

જેની ગઝલમાં છંદ કે જેના ગીતોમાં લય નથી,

પીએચ, ડી, કરવું જ હો તારે તો કર મારી ઉપર;

રીસર્ચનો મારાથી ઉત્તમ અન્ય કોઈ વિષય નથી,

પહોંચી શક્યા ના જે દલીલોમાં કહે છે એ વડીલ,

"તારી હજી તો પંચ સામે બોલવાની વય નથી",

આવ્યો ક્ષિતિજે સૂર્ય હમણાં આથમ્યો કે આથમ્યો;

છો આથમે, અંધારનો સહેજે 'પ્રદીપ'ને ભય નથી.