રૂપલી ભાતો

છીએ અમે ટમટમ તારલા

રૂપલી ભાતો  ભરશું

જલે ભલે જીગર અમારા

ઝગમગ ઝગમગ ખરશું

છીએ અમે નાનાં ઝરણાં

વાટે ખળખળ રમશું

છોને આવે પથ્થર આડા

ગીતો સજતા સરશું

છીએ અમે કેડી નાની

પર્વત શીખરો ચઢશું

સંત શૂરાના મારગ થઈ

ધર્મ ધ્વજાએ  ભમશું

છીએ અમે સુંવાળા રંગી

પવન પલાણે ઉડશું

કંટક મધ્યે ભલે જીવીએ

ફૂલડાં  થઈ  મ્હેંકશું

ભલે આવતાં વાવાઝોડાં

સમય  આવે  ઝુકશું

દેશું સંદેશ જગે મજાનો

ઝુક્યા તો ભાઈ જીવશું