રૂપિયા વગર ક્યાં જીવાય છે ?

રૂપિયા વગર ક્યાં એમ ને એમ જીવાય છે ?

તમારા રૂપિયાથી જ તમારી પ્રતિષ્ઠા મપાય છે,

હવે તો જીવવું અને મરવું પણ અઘરું થઈ જવાય છે,

રૂપિયા વગર ક્યાં એમ ને એમ જીવાય છે ?

નોર્મલ ડિલીવરી બહુ ઓછી હવે થાય છે,

અહિંયા તો દરેકની સિજેરીયન કરાવાય છે,

રૂપિયા વગર ક્યાં એમ ને એમ જીવાય છે ?

છોકરું આવે ઘરે ને ઉત્સવ ઉજવાય છે,

ત્યાં પેલા કંચનમાસી આવીને પુરા એકવીસ હજાર લઈ જાય છે,

રૂપિયા વગર ક્યાં એમ ને એમ જીવાય છે ?

સારા ભવિષ્ય ને કાજે છોકરાને ભણાવાય છે

નિશાળની ફિ ભરવા બાપા ઓવર ટાઈમે જાય છે,

રૂપિયા વગર ક્યાં એમ ને એમ જીવાય છે ? 

ભણીને દીકરો થયો મોટો, હવે એને પરણાવાય છે

લોક લાજે બાપાથી, પૈસાનું પાણી થાય છે,

રૂપિયા વગર ક્યાં એમ ને એમ જીવાય છે ? 

પરિવાર થયો મોટો, ત્યાં દીકરો નોખો થાય છે

ડોહા-ડોશીની ખોરાકી હવે ક્યાં પોસાય છે,

રૂપિયા વગર ક્યાં એમ ને એમ જીવાય છે ? 

છોકરા મોટા કરવામાં મા-બાપ ઘસાય છે

ભેગી કરેલી મૂડી બધી એમાં વપરાય છે,

રૂપિયા વગર ક્યાં એમ ને એમ જીવાય છે ?

રૂપિયા-રૂપિયાની લહાયમાં માણસ મરી જાય છે,

"રા,મ," કહે મર્યા પછી પણ ક્યાં મફતમાં બળાય છે,

રૂપિયા વગર ક્યાં એમ ને એમ જીવાય છે ?