રચના કરી

હાય ! કોણે આ વિરોધાભાસની રચના કરી ? 

ખારા આસું આંખે દઈને પ્યાસની રચના કરી.

બે અધર મૂંગા રહી જે ના કદી બોલી શક્યા, 

વણકહયું સમજાવવા અહેસાસની રચના કરી.

સૌ પ્રથમ માટીના તનમાં મીણનું હૈયું દીધું,

ને પછી એ તોડવા વિશ્વાસની રચના કરી !

એ નસીબે હોય નહિ તો મોહ શું એનો ભલા ?

ગમતું છોડી ખુદબખુદ સન્યાસની રચના કરી !

જિંદગી સમ શુષ્કતા ધરતીય રાખે ક્યાં સુધી ?

એટલે લીલાશ સાથે ઘાસની રચના કરી !

આભ સાથે આંખને સુંદરતા અર્પી એ રીતે,

બે જગાએ પાણીના આવાસની રચના કરી.

તું ય કારીગર અસલ છે, ઓ ખુદા હું શું કહું ?

પૃથ્વી પર ક્ષિતિજ રચી આભાસની રચના કરી !

આભ ફાટ્યું,પહાડ તૂટ્યો,તોય ઉફ્ મેં ના કર્યું,

જોઈ લો, સૌથી અલગ ઈતિહાસની રચના કરી.

આમ તો મારા હતા પણ આજથી થઈ ગ્યા રકીબ,

દોસ્ત!અંગત રહી ગજબ ઉપહાસની રચના કરી.