પ્રણયની ગાંઠ

પાલવના છેડે બાંધેલી પ્રણયની ગાંઠ ન છૂટે,

લાલ ચટ્ટક ઓઢણીના પાલવનો મોહ ન છૂટે.

લાલ લે'રિયાની ભા'ત્યુંમાં મન મારું અટવાયું,

કાજળઘેરી નેનોના નૈનબાણોનો મોહ ન છૂટે.

પ્રણયનો પતંગ તેની ચૂંદડીની સંગે ઉડાઉડ કરે,

તેના છરાકટ પતંગ સાથે પ્રેમના પેચનો મોહ ન છૂટે.

નયનો અંતરના ઝરુખેથી મીટ માંડીને રાહ જુએ,

તેની વા'ટ્યું'માં આશાઓની ડોર હાથમાંથી ન છૂટે.

ભીડ ભરેલી ખીચોખીચ ઈચ્છાઓથી ઘેરાયેલો છું,

પ્રિયાના પાલવડે બાંધેલી ગાંઠ્યેથી મનનું સંધાન ન છૂટે.