પ્રેમ
પ્રેમ
તેં મને સોના-હીરા-મોતીનાં અલંકારોથી મઢી ન દીધી,
પણ હા, મારાં મુખ પર લાખેણું સ્મિત સદા યે રાખ્યું.
તેં મારાં દામનને ફૂલોની વર્ષા કરીને ભરી ન દીધું,
પણ હા, કદી કાંટો ન ખૂંચે તેનું ધ્યાન સદા યે રાખ્યું.
તેં મને રાજાની પટરાણી જેવાં એશો-આરામ ન દીધાં,
પણ હા, તેં મને ક્યારેય જરા પણ થાકવા ન દીધી.
તેં મારા જીવનને સૂરજ સમ તેજથી આંજી ન દીધું,
પણ હા, મારાં આશા દીપને સદાય ઝળહળતો રાખ્યો.
તેં મને ચાંદ-તારા લાવી આપવાનું ક્યારે પણ ન કહ્યું,
પણ હા, જીવન સ્વર્ગીય લાગે તેનો સદાય ખ્યાલ રાખ્યો.
તેં મારી છબીને વોલેટમાં રાખવાનું ક્યારે ન વિચાર્યું,
પણ હા, તારા દિલથી તેં મને ક્યારેય અળગી ન કરી.
તેં મને ક્યારેય મોંઢે-મોંઢ 'આઈ લવ યુ' એવું ન કહ્યું,
પણ હાં, તારી ખામોશીમાં પ્રેમ ગીત સદાય ગૂંજતું રહ્યું.