પ્રેમ પારસમણિ

એરી સખી રી જો ને, મન મારું થઇ ગયું રે આકળું,

આવ્યું પિયુનાં દેશથી મતવાલું શુ કોઇ કાળું રે વાદળું !

હા રે સખી રી..જો ને, પ્રેમ પારસમણિ રે કહાવે !

લાવ્યું વરસાદ અનરાધાર ભરી નિજમાં યાદનાં રે વારિ,

વાવડ પિયુનાં લાવે ન વેરી, થાકી નિત વાટ રે નિહારી !

હા રે સખી રી જો ને, પ્રેમ પારસમણિ રે કહાવે !

નિષ્ઠુર વીજનાં મહેણાં-ટોણાં મુને શા કાજે રે તડપાવે,

અધૂરું મિલન યાદ બની અંગ અંગ અગન રે વરસાવે !

હા રે સખી રી જો ને, પ્રેમ પારસમણિ રે કહાવે !

દાદુર, મોર, બપૈયા કરે હસી-ઠીઠોલી મધુરસ રે ઘોળી,

અશ્રુજલ વહે નિશદિન નયને, ભીંજવે મારી રે ચોળી !

હા રે સખી રી જો ને, પ્રેમ પારસમણિ રે કહાવે !

વિયોગ તણી અગ્નિએ તાપી પ્રેમને કસોટીએ રે ચડાવું,

પિયુ કાજે પ્રતીક્ષાની એરણે પરિશુદ્ધ કંચન રે બનાવું !

હા રે સખી રી જો ને, પ્રેમ પારસમણિ રે કહાવે !

પ્રેમ પારસમણિ સંજોવું હૈયે જે પ્રથમ મિલને રે પામી,

અંતિમ મિલન થશે શાશ્વત એકદા સૌ કટાક્ષ રે ડામી !

હા રે સખી રી જો ને, પ્રેમ પારસમણિ રે કહાવે !

વરસાદ યાદ થૈ વરસે, કેમ છોડું પિયુ મિલનની રે રાહ ?

હો વિયોગ તલવાર બેધારી 'દીપાવલી' ન ભરે રે આહ !

હા રે સખી રી..જો ને, પ્રેમ પારસમણિ રે કહાવે !