પાર્થને કહો ચડાવે બાણ

ફૂંકાયું રણશિંગું, ને થયો શંખનાદ, 

કરી હાંકલ શૂરજનોએ ચડી ગગનભેદ !

હે કેશવ ! પાર્થને કહો ચડાવે બાણ,

આવ્યા સામસામે બંને પક્ષો કરી લલકાર,

ચડસા ચડસીમાં બન્યા બંધુ જ શત્રુ અપાર !

હે કેશવ ! પાર્થને કહો ચડાવે બાણ.

ઊભા છે સ્વજનો જ, લડવા મુજ સંગ યુદ્ધ

થઈ હાવી લાગણીઓ, ને થયો પાર્થ બેશુદ્ધ !

હે કેશવ ! પાર્થને કહો ચડાવે બાણ.

તાકું બાણ સ્વજનો સમક્ષ ! કેવી ધર્મની ગતિ ?

થયો ચિંતાતુર એક વીર યોદ્ધા, કરે વિલાપ અતિ, 

હે કેશવ ! પાર્થને કહો ચડાવે બાણ.

ગયો વિસરી એ ક્ષણિક શૂરવીતણું કર્મ,

બતાવી રાહ, કરાવો જ્ઞાન, શું છે કર્મવીરનો ધર્મ ?

હે કેશવ ! પાર્થને કહો ચડાવે બાણ.

ગયો થંભી એ મહાયુદ્ધ કેરો બળવાન સમય !

દીધુું કેશવેે અજોડ ગીતાજ્ઞાન, થયો એ અભય, 

હે કેશવ ! પાર્થને કહો ચડાવે બાણ.

થયું ભાન કર્મનુ, લડ્યો ગાંડિવધારી પાર્થ, 

ચાલ્યું જીવન કર્મની ગતિએ, થયું એ સાર્થ !

હે કેશવ ! પાર્થને કહો ચડાવે બાણ.