પાદર સુધી જવાની

હું શોધવા પછી તો પાદર સુધી જવાની,

એ ના મળે મને તો ખેતર સુધી જવાની.

બેચેન છું ઘણીયે સામે મળી જવાને,

હું આંગણા વટીને એ ઘર સુધી જવાની.

જો શ્વાસની સુવાસે મોહિત કરી મને તો,

હું મ્હેકતા એ ભીના અત્તર સુધી જવાની.

ફાવી શકે મને જો ઊંડો પ્રવાસ કરવો,

લોહી બની હૃદયમાં અંદર સુધી જવાની.

ખાલી થશે ગગન આખું ખેરવી સિતારા,

વીણી શકાય એવાં અવસર સુધી જવાની.

આ એક પ્રેમ ખાતર, આપી શકું છું જીવન,

સામે જરાક માંગી, વળતર સુધી જવાની.

લાંબી સફર હશે તો, ભટકું પછી "ખુશી"થી,

શોધી વળું ખુદાને, પથ્થર સુધી જવાની.