નવરંગી શમણાં

તારી આંખોમાં આંજેલા નવરંગી શમણાંઓ,

જવે છે દિવસ ને રાત,

તરસ્યા આ કાન મારા ઝંખ્યા કરે છે,

પેલી કિધેલી મીઠકડી વાત.

તારા સ્મિતનો ફુવાર મને ઘેરી વળે ને,

પછી ખેંચે છે તારી સમીપ,

જાત મારી ભૂલીને ગોતવા માંડું છું તને,

ખોલીને દરિયાની છીપ.

ઝંખના આ તારી મને પાગલ કરે,

હવે ઝૂરવાની હોય શું વિસાત ?

તરસ્યા આ કાન મારા ઝંખ્યા કરે છે,

પેલી કિધેલી મીઠકડી વાત.

શમણાંઓ દાબડીમાં છાની,

રાખો તો એમાં શું મારી કોઈ ધાડ ?

સપનાનો સુરમો હજી આંખે લગાડી દયો,

ખોલીને દિલના કમાડ,

આંખોના આંજણ કોઈ કામણ કરે છે,

હું તો ઝબકીને જાગુ મધરાત,

તરસ્યા આ કાન મારા ઝંખ્યા કરે છે,

પેલી કિધેલી મીઠકડી વાત.

નજરું ને આમતેમ ફેરવીને આછી,

શીદ સંતાવો છો પેલે પાર ? 

મનની આ અકળામણ ગૂંગળાવી નાખે,

સમજોને અમથું લગાર.

કહેવાનું હોય તે સાફ સાફ કહી દઈને,

ખુલ્લી કરી દયો જાત,

તરસ્યા આ કાન મારા ઝંખ્યા કરે છે,

પેલી કિધેલી મીઠકડી વાત.