નથી શકતાં
નથી શકતાં
શીખ્યાં એટલું જીવનમાં,
નવું ગ્રહણ કરી નથી શકતાં,
એકડાં હવે આ ઉંમરમાં નવા,
અમે, ઘૂંટી નથી શકતાં !
મળ્યાં કેટલાંય જખમો,
આ જીવનનાં પડાવમાં,
જખમો હૃદયનાં વધુ હવે,
અમે, ખોતરી નથી શકતાં !
સહ્યા આઘાત અને પ્રપંચ,
પોતાનાં કહેવાતાંઓ થકી,
વિશ્વાસનાં ખેતરમાં હવે,
અમે, નવું બીજ રોપી નથી શકતાં !
મળી અસફળતા અનેક,
દરેક પગલે આ જીવનમાં,
એક ડગલું સફળ પ્રયત્ન તરફ હવે,
અમે, ચાલી નથી શકતાં !
ડંખ્યાં અનેક ખુશબુદાર,
ફૂલો બગીચાનાં, કંટક થઈને,
સુગંધ એક ગુલાબની હવે,
અમે, સૂંઘી નથી શકતાં !
ઉછેર્યા કેટલાંય સંબંધો,
ધરી “ચાહત” અને માવજત,
હૃદયનાં કુંડામાં હવે,
અમે, નવો છોડ ઉગાડી નથી શકતાં !