નિશા

જીવનની ઘટમાળ સમજાવે છે આ નિશા,

સુખ-દુઃખના ચક્રને બતાવે છે આ નિશા.

સુખ કેરા સવારની આશ લઈ આવે છે નિશા,

દુ:ખને ભૂલી; આત્મમંથન કરાવવા આવે છે નિશા.

અનેરી શીતળતાનો અહેસાસ કરાવે છે આ નિશા,

મસ્ત આહલાદક મોસમનું સર્જન કરે છે આ નિશા.

ચાંદનીનો તાજ પહેરી રાણી બને છે આ નિશા,

ટમટમતાં તારલિયાથી સોહાય છે આ નિશા.

દિવસની ભાગદોડ બાદ આરામ લાવે છે નિશા,

નિંદ્રા થકી સઘળો થાક ઉતારી જાય છે આ નિશા.

જિંદગીની અધૂરપ પૂરી કરવા આવે છે આ નિશા,

'અજીજ' સપનાઓ બતાવી; જીવનને રંગવા આવે છે આ નિશા..!!