નાનેરું બીજ

શક્યતાઓનો અસીમ ખજાનો એક નાનેરા બીજમાં,

છૂપ્યું આખું વિશાળ વન ઘનેરું એક નાનેરા બીજમાં !

પથ્થરો છાતી ફાડીને ઊગવાની હિંમત કરી છે કૂંપળે,

આભ આંબવાનો આત્મવિશ્વાસ એક નાનેરા બીજમાં !

સિંચાયું જો આજે હેતની હેલીએ એ કુમળું જીવન,

બાગ આખો મહેંકાવાની હામ છે એક નાનેરા બીજમાં !

જરૂરી છે આજને સંવારવી પામવા સોહામણું ભવિષ્ય,

મીઠા ફ્ળોનો મબલખ આસ્વાદ છે એક નાનેરા બીજમાં !

'દીપાવલી' કરી લે જતન પ્રેમે આજે એ બાળ તરુવરનું,

તારી સાત પેઢીઓને તારવાંની નેમ એક નાનેરા બીજમાં !