તારી મિત્રતા

આપણી આ લાગણીનો પ્રાણ તારી મિત્રતા,

બાળપણનું સાચવેલું વ્હાલ તારી મિત્રતા,

ગામના એ પાદરે તો ખૂબ રખડયાં આપણે,

આંબલી ને પીપળીની યાદ તારી મિત્રતા,

કાનથી ના સંભળાય તો હૃદયથી માણજે,

આ હૃદયમાં સંઘરેલું ગાન તારી મિત્રતા,

ના ભલે હો કૃષ્ણ જેવા આપણે તો શું થયું ?

છે સુદામા સાથ એ આભાસ તારી મિત્રતા,

યાદના આ સ્નેહ સાગરમાં તું કંકર નાંખજે,

ત્યાં હતી એ ભાવનાની ભાત તારી મિત્રતા,

છો ભલે આવી ઘણી રાતો ઉદાસ આંખમાં,

સોણલી આ આંખમાં પ્રભાત તારી મિત્રતા,

ના કદીયે ઓલવાશે દીપ આ મૈત્રી તણો,

તેલ 'હેલી'ને દીવાની વાટ તારી મિત્રતા.