મોંઘી મિરાત થઈ ગઈ

જીવનમાં જ્યારથી એની સાથે મુલાકાત થઈ ગઈ,

જિંદગી જાણે ખુશીઓની સોગાત થઈ ગઈ !

હતું મારું જીવન અમાસના અંધકાર મળતાં,

એના આવતાં જ જાણે પૂનમની રાત થઈ ગઈ !

હતા કંકર મારી રાહમાં ડગલે ને પગલે,

એના આવતાં જ જાણે ફૂલોની બિછાત થઈ ગઈ !

મૌન મારું હૈયું ને મૌન મારા હોઠ હતાં,

બસ આજે એની સાથે મધુર વાત થઈ ગઈ !

હતું મારું જીવન કોરા કેનવાસ જેવું,

એના આવતાં જ જાણે હૈયે સુંદર ભાત થઈ ગઈ !

હતી હું તો સાવ કંગાળ,

મિલનથી એના કાચમાંથી કંચન મારી જાત થઈ !

નહોતાં મળતાં શબ્દો, છંદો અને લય ગઝલ લખવા,

પણ જોને વાત એની ગઝલમાં રજૂઆત થઈ ગઈ !

હતું મૂલ્ય મારું સાવ કોડીનું,

એને મળતાં જ જાણે મોંઘી મિરાત થઈ ગઈ !