મન મોગરો

મહેકે છે નિત એ આ હૈયે, આ તનમાં,

શ્વાસે ને શમણે એમ રહેતો મન મોગરો !

એના સંગે મધુર આ જીવન સફળ છે ને,

વહેતી પળોને અજવાળતો મન મોગરો !

જીવતરની સફરે સદા મારગ મહેકાવે વળી,

કારણ એ હર્ષનું ગૃહ કિલ્લોલ મન મોગરો !

હલેસું એ નૌકા કેરું વળી સઢ એ સદાનો,

મારી હિંમતનો હાથ થઈ રહેતો મન મોગરો !

સુખે એ સુખી અહીં દુઃખમાં ભાગીદાર બને,

હર સંકટને ખાળવાનું ખમીર મન મોગરો !

વેલ એ વીંટળાયેલ આ થડ ને પ્રચુર વળી,

પોષતો નિજ સ્નેહ કેરી ધારથી મન મોગરો !

પ્રીત પમરે સહજ થઈ નિત પ્રસરતો હૃદયે,

ફંફોસુ અહીં તહીં પણ મનમાં મન મોગરો !

મમ જિહ્વાનો સ્વાદ ને તનનો ચમકાર વળી,

આ જીવનના પડદા સજાવતો મન મોગરો !

સાત જન્મોનો વાયદો અહીં ઓછો છે ભલા,

આ જીવ કેરો જીવ છે એ મારો મન મોગરો !

મહેકે છે નિત એ આ હૈયે આ તન માંહી,

શ્વાસે ને શમણે એમ રહેતો મન મોગરો !