મળતું હશે ?

ધુંધળી નજરને દેખતી કરવા, ચશ્માનો સહારો લઈએ,

શું ધુંધળા વિચારોને ઉજાગર કરવા, ચશ્મા કોઈ મળતા હશે ?

ટીકાની વાત કોઈની, કાને ધરવા, યંત્રનો સહારો લઈએ,

શું ખુદની ટીકાને સુણવા, યંત્ર કોઈ મળતું હશે ?

પ્રશંસા ખુદની, જગતમાં કરવા, એમ્પ્લીફાયરનો સહારો લઈએ,

શું પ્રશંસા અન્યની, ખુશીથી કરવા, એમ્પ્લીફાયર કોઈ મળતું હશે ?

કથા નીજ જીવનની લખવા, કલમનો સહારો લઈએ,

શું વ્યથા પરાયા માનવીની લખવા, કલમ કોઈ મળતી હશે ?

બીમારી કાયાની દૂર કરવા, દવાઓનો સહારો લઈએ,

શું બીમાર મનને દુરસ્ત કરવા, દવા કોઈ મળતી હશે ?

અંધારી રાતમાં, માર્ગ સૂઝવા, દીવાનો સહારો લઈએ,

શું અંધારા હૃદયને પ્રકાશિત કરવા, દીવો કોઈ મળતો હશે ?

ગમે જે વસ્તુ, પ્રભુથી માંગવા, પ્રાર્થનાનો સહારો લઈએ,

શું ગમતી ખુશી, રંકને આપવા, પ્રાર્થના કોઈ કરાતી હશે ?

નજારો દ્રશ્યનો, શબ્દાંકિત કરવા, કવિતાનો સહારો લઈએ,

શું અદ્રશ્ય વેદનાને કહેવા, કવિતા કોઈ લખાતી હશે ?