કાળા અક્ષર

"કાળા અક્ષર ભેંસ બરાબર", તો લાલ અને ભૂરાનું શું ?

ભણી ગણીને મોટા થયા, રહ્યાં તો'ય અધૂરા, એનું શું ?

કાળા રંગની પાટી, કે પછી હોય બ્લેક બોર્ડ, 

ચોક-પેનથી કંડારેલા, સફેદ અક્ષરો નું શું ?

રંગભેદની આ નીતિ, અક્ષરોને ના સમજાણી,

નિરાક્ષરોની વાત બરાબર, પણ સાક્ષર નું શું ?

અક્ષરની આ દુનિયામાં, શું કાળુ, શું ધોળુંં, 

કલ્પનાની પાંખે વિહરતાં, આખે આખા શબ્દોનું શું ?

શબ્દોની માળા ગુંથીને, લખીએ કોઈ કવિતા, 

માતૃભાષામાં હજી બરાબર, પણ અન્ય ભાષાનું શું ?

ઊગે છે મનમાં લાખ વિચારો, 

વણલખ્યા તો ઠીક, લખાયા એનું શું ?

અક્ષરનો આકાર પામીને, 

કાગળ પર મંડાયા, એનું શું ?