મઝા આ કલ્પનાની છે

મઝા આ કલ્પનાની છે, એ સમજાવી નથી શકતા;

તમે બોલાવો છો અમને, અમે આવી નથી શકતાં !

અમસ્તા આપમેળે કહી દીધા છે દર્દ જીવનનાં,

કોઈ સામે જરા પૂછે તો, સંભળાવી નથી શકતાં !

અમારી સૌ સ્વતંત્રતાની કુરબાની અમે આપી,

છતાં શું છે કે સુખ-દુખમાં તને લાવી નથી શકતાં !

જરા સમજો, અમારી શું દશા થઈ છે મોહબ્બતમાં;

તમારી વાતમાં પણ દિલને બહેલાવી નથી શકતાં !

કહે છે સૌ મિલન માટે જરૂરી છે ચતુરાઈ,

અમે સાદા, કોઈ પણ વાત ઉપજાવી નથી શકતાં !

'કુલદીપ 'આપે ઘણાં ફૂલો ખીલવ્યાં, તાજગી આપી,

કળી દિલની તમારી કેમ વિકસાવી નથી શકતાં ?