મેહુલિયા ઓ મેહુલિયા

ઓ મેહુલિયા ઓ મેહુલિયા 

વરસીને તું તો ભરી દેજે નદી ને સરોવરિયા

ઓ મેહુલિયા ઓ મેહુલિયા,

પશુ-પંખીઓ તારી મીંટ માંડી જોવે છે વાટડી

મોર અને ચાતકની તું ભૂલતો નહીં રે પ્રીતડી

તારા વિના સાવ સૂના રે પડયાં છે ખેતરિયા  

ઓ મેહુલિયા ઓ મેહુલિયા,

તારા રિસામણા ખેડૂતની આંખો ને રડાવશે 

તારાં વિના સૌ જીવોને કોણ રે ખવડાવશે ?

તારી રે વાટ જોવે છે આ ખેડૂતનાં બળદિયા 

ઓ મેહુલિયા ઓ મેહુલિયા,

મૂશળધાર વરસીને ધરતીની કૂખ રે ભીંજવજે 

મેહુલિયા ઓ મેહુલિયા તું તો ચારેકોર વરસજે 

નાના બાળકોને કરવાં છે વરસાદમાં છબછબિયાં 

ઓ મેહુલિયા ઓ મેહુલિયા.