લાવ ચીતરું હથેળીમાં

લાવ, ચીતરું હથેળીમાં દરિયો...

એક દરિયો, જે મારામાં ભરિયો...

એક મોજામાં નામ - સરનામું લખીશ;

રેત - કાંઠાનું ગામ પરબારું લખીશ ....

અંગ - અંગના મરોડે પાથરિયો,

એક દરિયો, જે મારામાં ભરિયો...

છીપ, મોતી, પરવાળાં, હલેસું, હોડી ...

આવ, કાંઠાના બંધનને સઘળાં તરછોડી ..

છેક નભમાંથી ઘરમાં ઊતરિયો,

એક દરિયો , જે મારામાં ભરિયો...

જળ ઊછળે તો છાલકને ઝીલી લઈશ..

તારા દોમ - દોમ વ્હાલપમાં ગાંડી થઈશ..

સાવ ઘરના ઉંબરમાં સાંભરિયો....

એક દરિયો, જે મારામાં ભરિયો...

લાવ, ચીતરું હથેળીમાં દરિયો...

એક દરિયો, જે મારામાં ભરિયો...