રસિયા તારા ચોકમાં
રસિયા તારા ચોકમાં
રસિયા ! તારા ચોકમાં રમવાને રાસ
ઝાંઝર મેં તો પગમાં બાંધ્યા રે લોલ !
રસિયા ! તારા હાંફવાને લગતા ઈ શ્વાસ
ઝબફ દઈ હાથે ઝાલ્યા રે લોલ !
રસિયા ! તારા હેમ હિંડોળે આજ
હીંચકવા હેલે ચડી રે લોલ !
રસિયા ! તારા અંતરભીના સાજ
ઉઘાડી હું દડદડ દડી રે લોલ !
રસિયા ! તારા ઊંચેરા અજવાસ
ધબકતાં સાગર સમા રે લોલ !
રસિયા ! તારા રૂપકડાં આવાસ
રણકતાં ઝાંઝર સમા રે લોલ !
રસિયા ! તારા રંગ ભીના અણસાર
ઝીલીને મેં કમખે ટાંક્યા રે લોલ !
રસિયા ! તારા ઉછીના ધબકાર
પાલવડે બાંધી રાખ્યા રે લોલ !
રસિયા ! તારા ચોક્માં રમવાને રાસ
ઝાંઝર મેં તો પગમાં બાંધ્યા રે લોલ !