કસ્તુરી
કસ્તુરી
પડછાયા જેવો હમણાં હતો ગજબ ને હવે છે ગાયબ,
કિસ્સા સમયનાં પણ અજબ,
કોઈનો ખૂટતો નથી તો કોઈ પાસે છે જ નહીં સમય !
ભાસે નિરસ જીવન આગમને પરિતાપના સંતાપથી,
અનિવાર્ય આલાપ જીવનગીતનો,
જખમની દૂંટીમાંથી જ તો ખરે છે કસ્તુરી આનંદની !
વૃક્ષ બને છે સૂકુંભઠ્ઠ પાનખરમાં કંગાલિયત પ્રદર્શન,
પછી ફૂટે છે કોમળ કળી, કૂંપળો,
વિસ્મય પમાડે જીવનનું આ વિરોધાભાસ રહસ્ય !
જરાક પ્રતિકૂળ સમય મચાવે ભયંકર કાગારોળ,
મુસીબત જ સાચી નિશાળ,
તેજમાં આવે નિખાર, તપે સોનું ધખધખતી ભઠ્ઠીમાં !
જૂનુંપુરાણું ખંડેર પણ બેનમૂન કલાકારીગરી,
જાણે લીમડાની એક ડાળ મીઠી,
જળમાં મીનપિયાસી શું છે આ કરિશ્મા કુદરતનો ?
જીવનના ગણિતમાં ભૂમિતિના નિયમ નથી કોઈ,
આપમેળે લીલુંછમ કે સહજ સૂકું,
પાનખરનાં અત્યાચારો પછી જીવનવૃક્ષ બને રંગબેરંગી !