કરી શકશો ?

દૂર રહો છો પણ દિલમાંથી દૂર કરી શકશો ?

ભૂલી જવા દિલને મજબૂર કરી શકશો ?

આસાન નથી લાગણીઓને અટકાવવી,

વ્યથા વિરહની મંજૂર કરી શકશો ?

ભૂલ તો તમને ચાહવાની જ કરી છે ને મેં,

પ્રેમમાં સજા આપવાનો કસૂર કરી શકશો ?

ચાંદના દિલમાંથી વહી રહી ચાંદની તો,

ચાંદ વગર ચાંદની મશહૂર કરી શકશો ?

વાત દિલની હોય ત્યાં અપેક્ષા ન હોય,

અકારણ પ્રેમ ભરપૂર કરી શકશો ?

આવ્યા જ છો તો મહેફિલનું માન રાખો,

પ્રેમના નશામાં જાતને ચકચૂર કરી શકશો ?

રિવાજોએ ચાહતનો શ્વાસ રૂંધ્યો છે સદા,

ચાહતનો અલગ તમે દસ્તુર કરી શકશો ?