કોણ સ્વપનાં જોતું હશે ?

તારા અને ચંદ્રકની મહેફિલે 

બેસી દિલોના મુક્ત રાગ છેડવા, 

ને આ શુક્રની ચકમકતી શુભ્ર 

દીવી તણી જ્યોતે ઘર ઉજાસવા,

કોણ સ્વપનાં જોતું હશે ? 

સ્વતંત્ર ઊંચે ઊડતાં પક્ષીઓની 

જેમ ઊડી આભ અવની ભમવા;

ને ગીતડાં કાન ભરંત મીઠડાં 

પ્રભાતકાલે ગવાતાં સમજવા,

કોણ સ્વપનાં જોતું હશે ? 

બેસી સપ્ત તુરગના રથ મહીં 

ચંદ્ર - રવિની સહે ગોષ્ઠી કરવા, 

ને ડુંગરો વાદળના પરે ચઢી 

છેડો નભનો જરી આવિષ્કારવા,

કોણ સ્વપનાં જોતું હશે ? 

વાતો સુણી કૌતુક, પ્રેમની ઘણી ;

સંગાથ સ્વર્ગ પરીની વિહરવા.

વૃંદાવનમાં જમુના તટે નાચી 

ફરી કનૈયા સહ ધેનુ ચારવા,

કોણ સ્વપનાં જોતું હશે ? 

ગીતો ગાઈ જંગલ, કંદરે અને 

ઊંચે બર્ફીલા ગિરિ શૃંગે ઘૂમવા, 

દૂરે વિશ્વથી : પશુ, પંખી, ઝાડ ને 

પ્રકૃતિ બાલ વચાળે વસી ઉલ્લાસે 

સદા ટહેલવા,

કોણ સ્વપનાં જોતું હશે ?