આ શહેર!
આ શહેર!
આ શહે ર!
થોકબંધ સમયની હડફેટો વચ્ચે,
સતતના ઉજાગરા વચ્ચે જીવતું શહેર !
પૈડાઓ ઉપર લપસતું શહેર,
જીવ સટોસટ નો ખેલ ખેલી,
બિચારાની માણસાઈને કસતું શહેર !
કોયલને કોઈ સાંભળતું નથી,
માળા વિનાના પક્ષીઓને ટહુકવાનું થતું નથી !
ઉડવાનું ભૂલીને કબૂતર પણ -
લિફ્ટ ઉપર આવ જાવ કરે છે !
શહેરની ફાંદ વધવાનો રોગ
રોજે રોજ વકરે છે.
કોંક્રીટની ઊંચી ઊંચી દીવાલો વચ્ચે
અથડાઈ અથડાઈને નજરો બરછટ બની ગઈ છે !
ને ધૂમાડાના શ્વાસો શ્વાસ તો કોઠે પડી ગયા છે !
ટેલિફોનનું વાતોળિયું આ શહેર,
જાણે ઘોંઘાટના બોગડામાં
ઠાંસી ઠાંસીને પૂરાયેલું આ શહેર !
બે - ચાર કમોત કે હુલ્લડ પછી
હડતાલ રૂપે આ શહેર
બેસણું રાખે છે !
શહેરની ભીડમાંથી જતા
અલ્યા એ મોત પકડેલી મુઠ્ઠી
રસ્તામાં ક્યાંક ખૂલી ના જાય !