આ શહેર
આ શહેર
આ શહેર !
થોકબંધ સમયની હડફેટો વચ્ચે,
સતત ના ઉજાગરા વચ્ચે જીવતું શહેર !
પૈડાઓ ઉપર લપસતું શહેર,
જીવ સટોસટનો ખેલ ખેલી,
બિચારાની માણસાઈને કસતું શહેર !
કોયલને કોઈ સાંભળતું નથી,
માળા વિનાના પક્ષીઓને ટહુકવાનું થતું નથી !
ઊડવાનું ભૂલીને કબૂતર પણ -
લિફ્ટ ઉપર આવ જાવ કરે છે !
શહેરની ફાંદ વધવાનો રોગ
રોજે રોજ વકરે છે.
કોંક્રિટની ઊંચી ઊંચી દીવાલો વચ્ચે
અથડાઈ અથડાઈને નજરો બરછટ બની ગઈ છે !
ને ધૂમાડાના શ્વાસો શ્વાસ તો કોઠે પડી ગયા છે !
ટેલિફોનનું વાતોળિયું આ શહેર,
જાણે ઘોંઘાટના બોગડામાં ઠાંસી ઠાંસીને પૂરાયેલું આ શહેર,
બે - ચાર કમોત કે હુલ્લડ પછી
હડતાલ રૂપે આ શહેર
બેસણું રાખે છે !
શહેરની ભીડમાંથી જતા
અલ્યા એ -
મોત પકડેલી મુઠ્ઠી
રસ્તામાં ક્યાંક ખૂલી ના જાય !