ખૂબ અઘરું હોય છે

જળ નું રણ ને મળવું ખૂબ અઘરું હોય છે,

ઉદાસ સાંજ નું ઢળવું ખૂબ અઘરું હોય છે,

મૂરઝાયેલા ફૂલ ને દર્દ વિશે પૂછયું,

ખીલ્યા પછી ખરવું ખૂબ અઘરું હોય છે,

ગૂંગળામણનાં ભારથી શ્વાસ રૂંધાવા લાગે છે,

પલકો ભીંજાવ્યા વિના રડવું ખૂબ અઘરું હોય છે,

શાંતરાત્રિ, ચિક્કાર સન્નાટા, ઘડિયાળની ટકટકટક,

શૂન્યતાની ખીણમાં સબડવું ખૂબ અઘરું હોય છે,

વિચાર્યું હતું વેદના મારી ગઝલ થકી દુનિયા ને કહીશ,

વ્યથા ઉપર પણ 'વાહ વાહ' સાંભળવું ખૂબ અઘરું હોય છે.