કૈંક બદલાઈ જશે !
કૈંક બદલાઈ જશે !
આ બધું તો રહેશે,
પેલાં નભમાં ઉડતાં પંખી, ને માળામાં રમતી ચકલી,
ઝાડ પાર કૂદતો કાગડો, ને પાળી પર નિરાશ વાંદરો !
આ બધું તો રહેશે,
પેલું કનુનું અધૂરું હોમવર્ક, ને બબલીની નવી પેન,
રામુદાદાની ચ્હા, ને મગનભાઈનાં ભજિયાં !
આ બધું તો રહેશે !
ઓફિસમાં લેટ પટાવાળા, ને સમયસૂચક ઓફિસર,
ઘરની ધીમી મૂંઝવણ, ને રીસેસનું ખવાતું ટિફિન !
પણ ક્યાંક કૈંક બદલાઈ જશે,
જો તું મારી સાથે રહેશે તો !
તો તો હું જ બનું પંખી, ને હું જ હસતી ચકલી !
કાગડો, વાંદરો, તું જે કહે તે હું બનું !
જો તું સાથે રહેશે તો !
કનુને બબલી પણ આવશે આપણાં,
ચ્હા ને ભજિયાં માણવાની મઝા ચોમાસામાં,
જો તું સાથે રહેશે તો !
પછી તારી બનશે આ ઓફિસ, ને મારું પણ ઘર વસશે !
સમયને કોણ જુવે છે ? ને ઘડિયાળનું શું કામ હવે ?
જો તું સાથે રહેશે તો !