કાગળ પર...

ક્યારેક આંગળીના ટેરવાને રડવાનું મન થઈ જાય,

મૂકી માથું કલમની છાતી પર હીબકે ચડી જાય,

ને કાગળ પર અશ્રુની વેદના વણાઈ જાય,

ક્યારેક વેદનાની ઠેસ મુજને વાગી જાય,

ટેરવાથી દદડી ને ચોમાસું ધોધમાર વરસી જાય,

ને કાગળ પર અશ્રુમાં રુદન છલકાય જાય,

યાદોના ઊંડાણમાં ડૂબકી મારું ને શબ્દનાં છીપ મળી જાય,

કાગળ પર છીપલાઓ ખોલું ને અર્થોના મોતી વિખરાઈ જાય,

ને કાગળ પર અશ્રુની લાગણી વરસી જાય,

મારી મનગમતી વાતો ને કોઈ પાતાળે દાટી દે ને,

કાગળ પર મોતીની ઊર્મીઓ કોતરવાની જિદ રહી જાય,

ને કાગળ પર અશ્રુનું ગીત લખાઈ જાય.