જોને થયું પ્રભાત
જોને થયું પ્રભાત
કિરણોનો સ્પર્શ થતાં થયું નવું પ્રભાત,
સૂરજે પાડી જાણે ધરા પર સોનેરી ભાત !
જોને કેવું સુંદર સર્જાયું છે દૃશ્ય ધરા પર !
સીમને સોનું બનાવવા ચાલ્યો જગતનો તાત,
ધરાને સુંદર નમણી નાર જેવી સજાવે છે,
જોને સુંદર નીત નવા ફૂલોની આખી નાત !
ફૂલોનું બદન ચૂમી રહ્યા છે આ ભમરાઓ,
જોને આપસમાં કરી રહ્યા છે પ્રેમભરી વાત,
કેવું અદ્દભૂત ! કેવું રમણીય સર્જન છે ખુદાનું !
જોઈને મલકાઈ રહી છે આ માનવીની જાત,
આ હરખાતી મલકાતી સરિતા જઈ રહી છે,
એને પણ કરવી છે પ્રિયતમ સાથે મુલાકાત,
સૂર્યમુખીને ટપલી મારી જગાડે આ સૂરજ,
એને પણ કરવી છે આપસમાં પ્રેમની વાત,
જોને આ સમીર પણ ઘટનાનો સાક્ષી છે,
એ પણ પ્રસરાવી રહ્યો છે ફૂલોનો પમરાટ.